मागील भागात आपण प्रथिने, फळे आणि पालेभाज्या तसेच व्यायाम प्रकारातील वजन उचलणे, योगा, चालणे पळणे आणि जेवणाच्या वेळा याची माहिती घेतली. हा भाग तुम्ही पाहिला नसेल तर आजच्या दुसऱ्या भागाकडे वळण्या अगोदर “भाग पहिला” या लिंक वरून तो पाहून घ्या. म्हणजे येणारी पुढील भागांची माहिती सहज समजेल आणि चुकून काही सुटणार नाही. वजन कमी करण्याच्या प्रवासात संपूर्ण माहिती असणे खूप गरजेचे आहे, त्यामुळे काहीही मिस करू नका.
जेवणात काय असावे आणि प्रमाण किती असावे?
रोजच्या आहारात काय असावे जितके महत्वाचे आहे, तितकेच ते कधी घेतो यालाही खूप महत्व आहे. स्थूल माणसांमध्ये जंक फूड खाण्याचे प्रमाण अधिक आहे. तळलेले तुपकट पदार्थ चवीला चांगले वाटत असले तरीही शरीरातील चरबी वाढविण्याचे काम करतात. तुम्ही जे काही खाणार आहेत त्या सर्वांचे पचन होऊन साखररुपी मेद वाढविण्याची प्रक्रिया होत असते. पहिल्या भागात सांगितल्या प्रमाणे नियमित व्यायाम प्रकारांचा उपयोग करणे अति महत्वाचे ठरते. रोजचा आहार जास्तीत ताज्या भाज्या, फळे आणि प्रथिनयुक्त अन्नाचा असायलाच हवा. चपाती, खासकरून मैदा रोटी यातील कार्बोहायड्रेट सेवन कमी ठेवण्याचा प्रयत्न करावा.
आज तुमचे असलेले वजन खूप वर्षांच्या मेद साठवणुकीच्या हळुवार पद्धतीने वाढले आहे. त्याला पूर्णपणे जाण्यासाठी थोडा कालावधी देणे जरुरी आहे. बरेच जण लेख वाचून लगेच बदल घडत नाही म्हणून काही आठवड्यातच सर्व नियम मोडीत काढतात. असे मुळीच करू नका. वजन हळूहळू कमी होते. नियमित व्यायाम आणि सकस आहारामुळे एक वेळ अशी येते कि तुमचे वजन झपाट्याने कमी होण्यास सुरु झालेले असते पण तुम्ही नेमक्या त्याच वेळेस सोडून देण्याच्या मनस्थितीत आलेले असता. त्यामुळे खूप धीर धरून व्यायाम, चालणे, पळणे अगदी योगा सुरु ठेवा.
टीप: लक्षात असुद्या, अन्न कमी खायचे असले तरी रोजच्या कामांसाठी शरीराच्या गरजे इतके पुरेसे असावे. अगदी कमी खाऊन चक्कर येण्या इतके कमी खाऊ नका. नाहीतर वजन कमी करण्याचा प्रयत्न करणे तुम्ही सोडून द्याल किंवा अधिक अन्न खात रहाल.
वजन कमी करण्यासाठी पाण्याचे महत्व
शहरी भागात राहणारे खूपच कमी पाणी पितात हे प्रकर्षाने जाणवते. खासकरून पुरुष वर्ग पाणी पिणे अनावधानाने विसरून जातो. कामावर जाताना पाण्याची बाटली सोबत नेताना सहसा खूप कमी पुरुष मंडळी दिसतील. पाणी शरीरासाठी खूप गरजेचे असते हे सर्वजण जाणतात पण नकळत कमी पिणे हे सर्रास दिसते. मानवी शरीराला दिवसाला कमीतकमी ३ ते ४ लिटर पाणी आवश्यक आहे, हे विचारात घेतले तर प्रत्येकाने आपण किती पाणी पितो हे प्रामाणिकपणे विचार करण्यासारखे आहे. बिलकुल पाणी न पिणारे देखील लोक आहेत, आणि तेच मुळात अनेक विकारांना आमंत्रित करीत असतात. वजन वाढणे हे देखील त्यातीलच एक कारण.
टीप: लेखाच्या शेवटच्या भागात डायट प्लान दिला जाणार आहे, त्यामुळे प्रत्येक भाग काळजी पूर्वक लक्षात घ्या. कोणी कोणता डायट वापरायचा आहे हे त्यावरच ठरणार आहे.
क्रमशः ..
